„Ég hlakka til kvöldsins enda hefst þá hátíðin á nýjan leik þetta sumarið en hún hefur verið haldin allar götur frá árinu 2002 og meira að segja Covid gat ekki komið í veg fyrir að hún hefði verið haldin síðustu tvö árin,“ segir Torvald Gjelde, organisti, en hann hefur allan þann tíma haft veg og vanda af uppsetningu þessarar rammaustfirsku hátíðar.

„Þetta var töluvert meira af fólki en ég átti persónulega von á enda var þetta ekki mikið kynnt þannig,“ segir Bergur Már Hallgrímsson, deildarstjóri framkvæmdadeildar RARIK á Austurlandi.

Aðstandendur hins vinsæla Dyrfjallahlaups vonast til að bæta þátttökumet í hlaupinu þetta árið og ná 500 keppendum alls. Aðeins rúmlega 100 miðar eru eftir svo líklegt er að það markmið náist.

„Fyrir mitt leyti var þetta bara metnaður til að gera vel það sem maður tekur sér fyrir hendur og hafa fókus á það alla leið í endamarkið,“ segir Ester Rún Jónsdóttir, sem hlaut viðurkenningar fyrir framúrskarandi námsárangur í íslensku og erlendum tungumálum við útskrift í Verkmenntaskóla Austurlands nýverið. Stúlkan gerði reyndar gott betur því hún hlaut jafnframt raungreinaverðlaun Háskólans í Reykavík fyrir framúrskarandi árangur í raungreinum á stúdentsprófinu.

„Það var töluvert gert grín að því hversu margir Austfirðingar væru í skólanum en það er kannski bara merki um mikinn sköpunarkraft í fjórðungnum,“ segir Rebekka Rut Svansdóttir, sem nýverið útskrifaðist úr Kvikmyndaskóla Íslands, með handrit og leikstjórn sem aðalfög, ásamt fjórum öðrum Austfirðingum.

„Þetta var ekki þægilegasti ferðamátinn reyndar en allt gekk þetta vel og ég hafði bara gaman af þessu litla ævintýri,“ segir Sævar Kristinn Jónsson, bóndi að Miðskeri í Hornafirði.