Austurlandsskrifstofa Verslunarmannafélags Reykjavíkur flutti sig á dögunum um set á Egilsstöðum og opnaði nýja og glæsilega skrifstofu að Kaupvangi 3b. Kristín María Björnsdóttir er í forsvari fyrir VR á Austurlandi. Í móttöku sem efnt var til fyrir félagsmenn í tilefni af flutningunum sagði hún vinnuaðstöðu alla verða mun betri í nýja húsnæðinu en verið hefur.
Tillaga um að leggja inn aðildarumsókn hjá Evrópusambandinu var í dag samþykkt á Alþingi með 33 atkvæðum gegn 28 en tveir þingmenn sátu hjá. Í kjölfarið fögnuðu menn ýmist eða hörmuðu niðurstöðuna, líkt og þessi íbúi á Egilsstöðum, sem flaggaði íslenska fánanum í hálfa stöng til að sýna vonbrigði sín.
Ellefu félagar úr Vinstrihreyfingunni - grænu framboði í Norðausturkjördæmi hafa sent formanni flokksins, Steingrími J. Sigfússyni, opið bréf þar sem þeir skora á hann að greiða ekki atkvæði með frumvarpi um aðild Íslands að Evrópusambandinu.
Listahátíð ungs fólks á Austurlandi stendur nú sem hæst á Seyðisfirði og er verulega líflegt í bænum. Í vikunni hafa gengið á fjölmargir viðburðir á vegum hátíðarinnar, í höfn komið tvö skemmtiferðaskip og einnig Norræna með alla sína farþegafjöld að vanda. Í dag opna fjórar sýningar samhliða í bænum; ljósmyndasýning LungA 2000-2009, ,,We Go Places" í gamla bakaríinu, ,,Lífsmörk" í gömlu bókabúðinni og ljósmyndasýning Helga Snæs á Vesturvegg Skaftfells. Hönnunarsýning Lunga verður í kvöld í Strandarsíldarskemmu. Meðal þátttakenda í Lunga eru allir sumarstarfsmenn ungmennavinnuflokks Landsvirkjunar í Fljótsdalsstöð, en þeir eru þar í boði fyrirtækisins og halda launum á meðan.
.
Hreindýraveiðar hófust í gær og fyrstu fréttir af veiði voru af tarfi sem felldur var í landi Þuríðarstaða í Fljótsdal um kaffileytið í gær. Þá var tarfur skotinn í Skriðdal nokkru síðar og annar í Hjaltastaðarþinghánni snemma í gærkvöld. Jóhann G. Gunnarsson hjá veiðistjórnunarsviði Umhverfisstofnunar telur að þrettán veiðimenn hafi verið við veiðar í gær. Veður til veiða er heldur önugt í dag, rigning, vindur, um tíu stiga hiti og skyggni takmarkað. Veiðimenn láta það þó væntanlega ekki aftra sér frá að halda galvaskir til veiða. 
Stöðfirðingar ætla að halda þorpshátíð um helgina þar sem aðeins verður byggt á skemmtiatriðum og hugmyndum heimamanna.
Hreindýraveiðitímabilið hófst í dag. Veiða má tarfa til 1. ágúst en eftir það einnig kýr og kálfa.
Tarfaveiðarnar út júlí eru skilyrtar á þann hátt að einungis má veiða tarfa sem eru ekki nálægt hreinkúm. Þá eru veturgamlir tarfar friðaðir. Veiða má 1.333 dýr á vertíðinni. 3.266 umsóknir um veiðileyfi bárust Umhverfisstofnun. Leiðsögumenn fóru með veiðimenn inn á veiðisvæði strax í nótt en ekki er vitað til að dýr hafi enn verið fellt. Veiðimenn eru hvattir til að nýta veiðitímabilið allt, en geyma ekki veiðar fram á síðasta dag. Veiðitímanum lýkur 15. september.
Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.