Allar fréttir
Fjórir nýir þingmenn í NA-kjördæmi-Vinstri grænir fengu flest atkvæði - Arnbjörg dettur af þingi
Síðustu tölur úr Norðausturkjördæmi bárust um kl. níu í morgun. Á kjörskrá voru 28.362. Talin atkvæði eru 24.249 og kjörsókn 85,5%. Framsóknarflokkur hlaut 5.905 atkvæði, Sjálfstæðisflokkur 4.079 atkvæði, Frjálslyndi flokkurinn 384 atkvæði, Borgarahreyfingin 690 atkvæði, Lýðræðishreyfingin 61 atkvæði, Samfylkingin 5.312 og Vinstri hreyfingin-grænt framboð 6.937 atkvæði. Auðir seðlar voru 826 og ógildir seðlar 55. Þetta voru síðustu tölur sem beðið var eftir í kosningunum. Samkvæmt þessu er Sjálfstæðisflokkurinn með 17,5% fylgi í kjördæminu og fær tvo menn (missir 1), Framsóknarflokkur með 25,3% og fær tvo menn (missir 1), Samfylking 22,7% og fær þrjá menn, þar af einn jöfnunarmann, Vinstri hreyfingin-grænt framboð með 29,7% og fá þrjá menn og Frjálslyndi flokkurinn með 1,6% og engan mann. Borgarahreyfingin hlaut 3% og er ekki með mann í NA og Lýðræðishreyfingin með 0,3% og fær ekki heldur mann.
Þjóðleik púslað saman
Þjóðleikur, stærsta leiklistarhátíð sem haldin hefur verið á Íslandi, var sett við formlega viðhöfn fyrr í dag. Í opnunarhófi veittu Tinna Gunnlaugsdóttir þjóðleikhússtjóri og Vigdís Jakobsdóttir deildarstjóri fræðsludeildar Þjóðleikhússins viðurkenningar til leikhópanna þrettán sem taka þátt. Meðal gesta voru forseti Íslands, hr. Ólafur Ragnar Grímsson, Katrín Jakobsdóttir menntamálaráðherra, þingmenn og frambjóðendur í Norðausturkjördæmi og bæjarstjóri Fljótsdalshéraðs. Ungmenni af öllu Austurlandi sem þátt taka í Þjóðleik flykktu sér um kl. 13 í mikla skrúðgöngu við Valaskjálf og marséruðu niður að menningarmiðstöðinni Sláturhúsinu. Á þessum tveimur stöðum fara fram hátt í 30 leiksýningar á næstu þremur dögum. Hóparnir lögðu hver sitt púsl í mynd sem, þegar allt var komið, myndaði merki Þjóðleiks.
Ár stjörnufræðinnar - Undur alheimsins
Helgi Hallgrímsson skrifar: Árið 2009 hefur verið útnefnt „Alþjóðlegt ár stjörnufræðinnar“, að frumkvæði Alþjóðasambands stjörnufræðinga (IAU) og UNESCO, undir kjörorðinu Undur alheimsins. Opnunarhátíð var haldin í París 15. og 16. janúar sl. Það fór víst framhjá fjölmiðlafólki á Íslandi, sem þó mun vera í hópi 135 ríkja sem lofaði þátttöku.
Nýir þingmenn Austfirðinga?
Mikil gleði ríkti á kosningaskrifstofu Samfylkingarinnar á Egilsstöðum í kvöld, þegar ljóst varð að Jónína Rós Guðmundsdóttir yrði líklega þingmaður norðausturkjördæmis ásamt þeim Kristjáni L. Möller og Sigmundi Erni Rúnarssyni. Þau atkvæði sem talin hafa verið benda til að Samfylkingin sé að vinna stórsigur í kosningunum. Aðrir splunkunýir þingmenn kjördæmisins gætu orðið Sigmundur Ernir Rúnarsson, Samfylkingu, Björn Valur Gíslason fyrir Vinstri græna og Tryggvi Þór Herbertsson fyrir Sjálfstæðisflokk.
Hollvinasamtök Heilsugæslu Fjarðabyggðar stofnuð
Sunnudaginn 26. apríl voru stofnuð Hollvinasamtök Heilsugæslunnar í Fjarðabyggð. Stofnfundurinn var haldinn í Safnaðarheimilinu á Reyðarfirði og var mjög vel sóttur. Í frétt um stofnun samtakanna á vefnum www.hsa.is má lesa að í stofnskrá komi fram að samtökunum sé ætlað að auka tengsl almennings við heilsugæsluna og efla hag hennar, meðal annars með fjárhagslegum og siðferðilegum stuðningi og aukinni kynningu út á við. Formaður samtakanna er Björn Grétar Sveinsson. Samtökin hafa sett upp vefsíðuna www.hollvinir.123.is.
Kjósendur sýna vilja sinn í dag
Alþingiskosningar eru í dag. Kjörstaðir opnuðu kl. 09 og flestir verða þeir opnir fram til kl. 22 í kvöld. 227.896 manns, 18 ára og eldri, mega kjósa; 114.295 konur og 113.601 karl. Kosið er í sex kjördæmum um 63 fulltrúa stjórnmálaflokkanna og eru 54 þeirra kjördæmakjörnir og 9 jöfnunarþingmenn. Kosningaveðrið á Austurlandi er með ágætum, fremur stillt og gengur á með skúrum. Ástand vega er þokkalegt, en Öxi og Hellisheiði lokaðar, auk vegarins í Mjóafjörð. Þar er þó snjótroðari til taks og verður annað hvort siglt með atkvæði Mjófirðinga yfir á Norðfjörð eða farið með þau á snjóbílnum áleiðis til Egilsstaða eftir atvikum. Á vefnum www.kosning.is má finna ýmsar nytsamlegar upplýsingar um kosningarnar.
