Blak: Heimaleikjum kvennaliðsins lokið
Lið Þróttar í úrvalsdeild kvenna í blaki tapaði sínum síðasta heimaleik í deildinni á þessum vetri. Það kann að verða dýrt í harðri samkeppni um sæti í úrslitakeppninni.Þróttur fékk Álftanes í heimsókn um síðustu helgi, en liðin eru tvö af þremur sem í hnapp eru um þriðja og fjórða sæti deildarinnar en fjögur efstu liðin komast í úrslitakeppnina.
Álftanes átti fyrsti hrinuna og vann hana 7-25. Sú næsta varð þrælspennandi en Álftanes vann hana eftir upphækkun, 25-27. Þriðja hrinan var einnig jöfn en gestirnir höfðu hana 22-25.
Ester Rún Jónsdóttir var stigahæst hjá Þrótti með 7 stig. Skörð hafa verið höggvin í liðið að undanförnu þar sem Covid hefur breiðst út á Norðfirði.
Þróttur er í þriðja sæti deildarinnar með 22 stig úr 16 leikjum, Afturelding í fjórða með 21 stig úr 15 leikjum og HK í fimmta með 20 stig úr 14 leikjum. Þróttur á eftir leiki gegn HK og Völsungi, sem er í sjötta sæti.
Karlaliðið tók á móti Vestra og hafði betur í oddahrinu eða 25-16, 24-26, 25-21, 18-25 og 15-13. Ramses Ballesteros varð stigahæstur með 19 stig.
Ólíklegt er að karlaliðið nái inn í úrslitakeppnina á þessari leiktíð. Það er í sjötta sæti með 21 stig úr 17 leikjum, þremur stigum á eftir Vestra í fimmta sæti og átta stigum frá KA í því fjórða.
Kvennaliðið spilar um næstu helgi við HK í átta liða úrslitum bikarkeppninnar.
Michell Traini smassar, Amelía Rún Jónsdóttir og Paula Miguel de Blaz í hávörn. Mynd: Sigga Þrúða
