Blak: HK knúði fram oddaleik
Þróttur og HK mætast í hreinum úrslitaleik um Íslandsmeistaratitil
kvenna í blaki í Neskaupstað á laugardag. HK hafði betur í annarri
viðureign liðanna í kvöld í Kópavogi í oddahrinu.
HK stelpur voru á tánum í byrjun og sigruðu fyrstu tvær hrinurnar örugglega, 25-20 og 25-12. Ekki leit út fyrir að Þróttarar yrðu virkir þátttakendur í leiknum og var vandræðagangur nokkur.
Í upphafi þriðju hrinu mættu þær hins vegar tvíefldar til leiks og komust í 5-0. Þær unnu síðan hrinuna sannfærandi 25-16. Stuðið á austanstelpum hélt áfram í fjórðu hrinu og burstuðu þær hana 25-13.
Oddahrina staðreynd og spenna komin í Fagralundinn. Hrinan var þó aldrei spennandi og komust HK steplur í 7-2. Þær héldu öruggri forustu alla hrinuna og sigruðu 15-7.
Staðan í einvíginu er því 1-1 og leikinn verður hreinn úrslitaleikur laugardaginn 16. apríl klukkan 14:00 í Neskaupstað.
