Erna íþróttakona ársins
Erna Friðriksdóttir, skíðakona úr Skíðafélaginu Stafdal, var í gær
útnefnd íþróttakona ársins hjá Íþróttafélagi fatlaðra. Hún varð á
árinu fyrsta konan til að keppa á vetrarólympíuleikum fatlaðra fyrir
hönd Íslands.
Erna var ekki viðstödd verðlaunaafhendinguna í gær því hún er farin utan til Bandaríkjanna til æfinga. Faðir hennar, Friðrik Guðmundsson, tók við verðlaunum í hennar stað.
Í lok seinasta árs varð hún fyrst íslenskra kvenna til að tryggja sér þátttökurétt á vetrarólympíuleikum fatlaðra. Þeir fóru fram í Vancouver í Kanada í mars þar sem Erna keppti í tveimur greinum. Hún féll úr leik í þeim báðum en segist staðráðin í að vinna sér þátttökurétt á næstu leikum.
