Jóhanna Lilja valin í landsliðið á skíðum
Jóhanna Lilja Jónsdóttir, skíðakona frá Egilsstöðum, var í gær valin í landsliðið í alpagreinum á skíðum fyrir næsta vetur.Jóhanna Lilja er í B-landsliðið ásamt fimm öðrum en fjórir einstaklingar eru í A-landsliðinu. Framundan hjá landsliðunum er keppni á heimsmeistaramótum auk fjölmargra heimsbikarmóta. Í tilkynningu Skíðasambandsins segir að landsliðið í alpagreinum sé fullskipað, sem sé gleðiefni því það sýni styrk og breidd komandi kynslóðar.
Jóhanna Lilja er fædd árið 2004 og keppir undir merkjum Skíðafélagsins í Stafdal þótt hún æfi og stundi nám á Akureyri á veturna.
Síðastliðinn vetur gekk vel hjá Jóhönnu Lilju. Hún varð til að mynda í þriðja sæti í heildina í svigi á Skíðamóti Íslands þar sem hún vann bæði svig og stórsvig í sínum aldursflokki. Þá keppti hún á mótum í Austurríki, Belgíu, Ítalíu, Slóveníu, Noregi og Finnlandi.
Tímabilinu lauk um páskana á móti á hinu fræga skíðasvæði Val d‘Isere í Frakklandi. Besti árangur Jóhönnu á því móti var 12. sætið í hennar aldursflokki.
Jóhanna Lilja, lengst til hægri, á palli á Skíðamóti Íslands í vetur. Mynd: Skíðasamband Íslands.
