Körfubolti: Ekki tókst að vinna Hauka
Höttur tapaði sínum síðasta leik í fyrstu deild karla í körfuknattleik gegn Haukum í Hafnarfirði á föstudag. Haukar eru eina liðið sem Hetti tókst ekki að vinna í vetur.Höttur fór heldur betur af stað í leiknum en úrslitin ráðast ekki í fyrsta leikhluta, nema munurinn verði þeim mun meiri. Það var hann aldrei en Haukar voru með 19-17 forskot eftir hann.
Þegar skammt var liðið af öðrum leikhluta breyttist staðan úr 21-21 í 30-21. Þar með voru Haukar komnir með undirtökin og leiddu í hálfleik 49-36, eftir að hafa skorað tvær þriggja stiga körfur á lokamínútunni.
Haukar voru komnir í 59-44 í þriðja leikhluta þegar Höttur tók sig til og jafnaði með að skora 15 stig í röð. Áfram voru Haukar þó á undan og voru 69-63 yfir fyrir lokaleikhlutann.
Hafnafjarðarliðið var komið með tíu stiga forskot, 78-68 eftir þriggja mínútna leik í fjórða leikhluta. Höttur minnkaði muninn en komst aldrei verulega nálægt og lokatölurnar því 86-82. David Guardia var stigahæstur hjá Hetti með 19 stig en Tim Guers skoraði 17.
Haukar fara beint upp í úrvalsdeild sem deildarmeistarar. Liðið tapaði aðeins tveimur leikjum. Höttur er í öðru sæti, tapaði fimm leikjum, þar af öllum þremur leikjunum gegn Haukum. Sætið veitir þó heimaleikjarétt í úrslitakeppninni þar sem fjögur lið keppa um annað laust sæti í úrvalsdeild. Höttur mætir Fjölni í undanúrslitum og verður fyrsti leikur þeirra á Egilsstöðum á föstudagskvöld. Það lið sem hefur betur mætir annað hvort Sindra eða Álftanesi í einvígi um úrvalsdeildarsætið.
