Körfubolti: Nítján stiga sigur á Skallagrími
Höttur vann Skallagrím 104-85 þegar liðin mættust á Egilsstöðum í fyrstu deild karla í körfuknattleik á föstudagskvöld.Höttur hafði undirtökin svo að segja allan leikinn, enda nokkur munur á liðunum í deildinni. Eftir fyrsta leikhluta var staðan 26-17 en annar leikhluti var nokkuð jafn. Í hálfleik munaði aðeins þremur stigum, 43-40.
Í þriðja leikhluta sigldi Höttur örugglega fram úr og var yfir að honum loknum 71-59. Það hélt áfram í þeim fjórða og lokatölurnar, sem fyrr segir, 104-85.
Tim Guers var stigahæstur hjá Hetti með 27 en Arturo Fernandez skoraði 25.
Höttur er nú í öðru sæti deildarinnar með 38 stig. Lengi var liðið á toppnum en sú mynd var skökk þar sem liðið hafði leikið töluvert fleiri leiki en Haukar. Nú hefur Hafnarfjarðarliðið unnið upp sína leiki og gott betur, nú á Höttur leik til góða. Haukar hafa 42 stig á toppnum.
Höttur á næst ÍA á heimavelli á fimmtudagskvöld.
