Íslandsglíman: Myndir og viðtöl
Austfirskir glímumenn komust í fyrsta skipti á verðlaunapall í
Íslandsglímunni sem haldin var á Reyðarfirði í byrjun apríl. Agl.is var á
staðnum og fangaði stemmninguna.
Ragna Jara Rúnarsdóttir varð þriðja í glímunni um Freyjumenið. Hún sagðist ekkert endilega hafa sett stefnuna á þann árangur fyrir mótið.
„Mig langaði að koma og keppa í heimabænum því ég vissi að það kæmu margir að styðja okkur. Að sjálfsögðu vill maður alltaf ná í menið,“ sagði Ragna sem háði úrslitaglímur um verðlaunasætið. „Ég var orðin þreytt í þeim glímum. Það voru mjög sterkar stelpur á móti mér.“
Marín Laufey Davíðsdóttir, úr HSK, hampaði Freyjumeninu. Hún verður sextán ára í maí en þetta er hennar fyrsti sigur í keppninni.
„Ég stefndi að því að komast í verðlaunasæti og var búin að leggja hart að mér til að ná því en ég átti ekki von á að vinna. Ég ætla reyna að halda áfram eins lengi og ég get.“
Ásmundur Hálfdán Ásmundsson varð í þriðja sæti í glímunni um Grettisbeltið. Hann setur markið hátt fyrir framtíðina.
„Ég átti alls ekki von á þessu en það þýðir ekkert að hætta hér. Ég ætla að vinna beltið, helst strax á næsta ári.“
Menið endaði í höndum Péturs Eyþórssonar, Ármanni í sjötta skipti. „Ég setti mér það markmið fyrir þremur árum að ná Ingibergi Sigurðssyni sem vann sjö sinnum. Mig vantar því eitt í viðbót.“
Hann þurfti þó að hafa fyrir sigrinum. Yngri frændi hans, Bjarni Gunnarsson úr Mývetningi lagði hann í keppninni sjálfri. Í úrslitaglímunni var samt aldrei spurning um hver ynni.
„Ég klúðraði þessu á móti honum í fyrri glímunni. Ég vissi að mér dygði jafntefli og var því ekki í sóknarhug. Það kom aftan að mér. Það var mikið sjokk að liggja fyrir honum. Hann er samt þrælgóður og það var engin niðurlæging að tapa fyrir honum.“
