Þegar UÍA keypti kókaín fyrir Ringo Starr
Jakob Frímann Magnússon var í Síðdegisútvarpinu á Rás 2 fyrir Verslunarmannahelgina, þar sem hann ræddi um um hin ýmsu málefni við þáttarstjórnendur. Meðal umræðuefna var Atlavíkurhátíðin 1984, þegar Bítillinn Ringo Starr sótti Hallormsstað heim og tók á endanum lagið með Jakobi og félögum hans í Stuðmönnum á sviðinu í Atlavík.Jakob sannfærði Ringo um að koma með því að lofa honum og Barböru Bach konu hans öllu fögru og lýsti aðstæðum á Hallormsstað sem einkar glæsilegum.
„Ég skreytti það að vísu dálítið fagurlega, með Hallormsstaðaskóla, burstabænum og þessu fimm eða jafnvel sex stjörnu hóteli sem þar væri rekið og veitingahúsinu líka. Okkar besta veitingahús. Það sem meira var – við stóðum við það allt saman.
Eins og margoft hefur komið fram, þá hafði Ringo, verkamannasonur úr Liverpool, engan smekk fyrir gourmet fæði eða fínessum í koníaktegundum. Hann vildi bara kókaín,“ sagði Jakob Frímann.
Og því var reddað
„Það hefur nú ekki verið talað um það hér á öldum ljósvakans, þegar það þurfti að redda kókaíni fyrir stjörnuna á kostnað UÍA, Ungmenna- og íþróttasambands Austurlands. Það voru menn sendir í það, annars var stjarnan ekki geim. Það var nú ekki alveg í þeim austurlenska íþróttaanda sem til var stofnað þarna, með þessari fjáröflunarhátíð.“
Jakob Frímann sagði stjörnunni hafa verið lofað því að koma inn í rómantískan skóg á Íslandi, þar sem hann fengi hinn besta mat og drykk. Ekkert hafi þó verið þó talað um kókaín fyrr en þegar Ringo mætti á staðinn.
„Það var bara þegar það var komið á staðinn, skyndilega þá kom krísa og þurfti að redda því, á Austurlandi af öllum stöðum, árið 1984. Ég er nú með alveg hreina samvisku sjálfur en ég instrúeraði menn sem gátu gert það og haldið stjörnunni sæmilega hamingjusamri.“
Tístið óskar eftir nánari upplýsingum um málið af einskærri forvitni. Gaman væri til að mynda að glöggva sig nánar á götuverði kókaíns á Austurlandi árið 1984.
Mynd: Skjáskot af vef RÚV
