Ber stoltur nafnið Skógar-Þröstur
Húsvíkingar fylgjast grannt með sínu fólki og það á við um Þröst Eysteinsson, nýskipaðan skógræktarstjóra, sem þeir virðast hafa ættleitt eftir að hann vann þar sem framhaldsskólakennari að loknu háskólanámi.
Í héraðsfréttablaðinu Skarpi birtist nýverið vísa sem honum var send í tilefni embættistökunnar um áramótin og er svohljóðandi:
Skógræktarstjóra brautin bein,
byrjaði hér um daginn.
Skógar-Þröstur á grænni grein:
„Gangi þér allt í haginn.“
Á eftir fylgir síðan stutt skýring frá Þresti sjálfum sem virðist hafa tekið gælunafnið í sátt en ekki verið sáttur við það í fyrstu.
„Þegar ég var smákrakki var mér strítt með því að uppnefna mig skógarþröst, eins og börn gera gjarnan. Ég man að mér þótti það vont, ekki út af nafninu, heldur bara af því að verið var að stríða mér. Nú ber ég stoltur skógarþrastarnafnið.“