„Siðferðisleg skylda okkar að taka á móti flóttafólki"
Bæjarstjórn Fjarðabyggðar áréttaði á fundi sínum í gær fyrri stefnu sveitarfélagsins, um að það væri tilbúið til að taka á móti flóttamönnum í samstarfi við stjórnvöld. Bæjarráð hefur óskað eftir því við félagsmálanefnd að tekin verði umræða í nefndinni og framkvæmd greining á vegum hennar á innviðum samfélagsins vegna móttöku flóttamanna.
Jón Björn Hákonarson, forseti bæjarstjórnar, er ánægður með niðurstöðuna. „Stefna bæjarstjórnar Fjarðabyggðar hefur ekkert breyts – en Fjarðabyggð er tilbúin, nú sem hingað til, að taka á móti flóttafólki í samstarfi við stjórnvöld.
Sjálfur hef ég sagt að við eigum að taka á móti eins mörgum flóttamönnum og hingað vilja koma og við getum tryggt gott líf, en það verður að vera undirstaðan í öllu að geta tryggt slíkt. Sjálfum finnst mér það siðferðileg skylda okkar að taka á móti fólki sem er á flótta undan slíkum hörmungum eins og nú geysa víða í heiminum.
Það er okkur ekki síður hollt að velta því aðeins fyrir okkur að þrátt fyrir að okkur finnist stundum margt brjóta á í daglegu lífi á Íslandi þá er það hjómið eitt miðað við hörmungarnar sem margt af þessu flóttafólki stendur frammi fyrir á hverjum degi," sagði Jón Björn í samtali við Austurfrétt.
