Flætt inn í flesta kjallara við Lónið
Ár og lækir á Seyðisfirði eru í miklum ham og flæðir yfir bakka sína. Starfsmenn áhaldahúss kaupstaðarins hafa haft í nógu að snúast við að dæla úr kjöllurum húsa í dag.
„Staðan er vægt til orða tekið slæm. Það kemur óhemju mikið vatn ofan úr fjöllunum,“ segir Kristján Kristjánsson, staðgengill bæjarverkstjóra á Seyðisfirði.
Þegar Austurfrétt ræddi við Kristján á áttunda tímanum í kvöld var farið Dagmálalækut farin að flæða yfir Garðarsveg en við hann stendur meðal annars leikskólinn og knattspyrnuvöllurinn.
Starfsmenn áhaldahússins hafa í dag aðstoðað íbúa húsa við Lónið til að dæla úr kjöllurum. „Það flæddi inn í flesta kjallara. Dælukerfið hefur ekki haft undan.“
Ekki er vitað um neinar aurskriður en veginum út fjörðinn að Hánefsstöðum var lokað vegna vatnavaxta.
Úrkoman frá miðnætti á Seyðisfirði eru um 130 millimetrar samkvæmt tölum frá Veðurstofunni, hin mesta á landinu. Kristján segir heldur vera farið að draga úr regninu inni í bænum.
Garðarsvegur um kvöldmatarleytið. Mynd: Kristján Kristjánsson
Í fyrstu útgáfu fréttarinnar var mishermt að Fjarðará flæddi upp á Garðsveginn. Beðist er velvirðingar á þeim mistökum.
