Austur
Magnús Ingólfsson, fyrrum framhaldsskólakennari, gaf í dag út sína fyrstu ljóðabók, Tvíæringur tregans, í tilefni af 75 ára afmæli sínu.Magnús er tengdur Austurlandi, var sjö sumur í sveit í Brekku í Hróarstungu og heimsækir landshlutann á hverju sumri.
Ást hans á landshlutanum má lesa út úr meðfylgjandi ljóði, sem hann kallar „Austur“ og er í ljóðabókinni.
Austur
Dyrfjöll í dimmbláum skugga
dagur í austrinu rís
dagrenning guðar á glugga
með geislum frá Paradís
Fljótið man tímana tvenna
tærara fyrr á tíð
er Jökla fékk frjáls að renna
og fossa um Dal og Hlíð
í skógunum framtíð er falin
fagurt er Austurland
við ána og djúpan dalinn
en dapurt við eyðisand
því Askja varð örlagavaldur
í engu hlífði hún þeim
sem vetrarvindurinn kaldur
bar vonir um Vesturheim
en ein er mín albesta minning
mig dreymir svo endalaust
um heiðanna hlýjasta synning
og hreindýr á ferli um haust
og þá fær lífið sitt leiði
við ljúfasta sæluvind
og þá er ei harmur í heiði
og hamingjusöm hver kind
er hug minn hættir að dreyma
horfin mér dagrenning
þá Brekka mun heita mitt heima
og Hérað og Múlaþing
