Deilt um loftnet og rafmengun
Áhrif fjarskiptamastra á Selhæð og Brúarásskóla og rafmengun í fjárhúsum hefur talsvert verið rædd á Fljótsdalshéraði undanfarna mánuði.
Íbúar á Selhæð, í nágrenni við vatnsmiðlunartankinn þar, hafa óskað eftir nánari upplýsingum um áhrif frá fjarskiptamastri sem Vodafone setti upp á Selhæð. Íbúarnir hafa lýst yfir áhyggjum sínum af mögulegri geislun frá mastrinu og farið fram á að afstaða þeirra til framkvæmdarinnar verði könnuð. Í bréfi frá Vodafone kom fram að útvarpsbylgjur frá endurvarpsstöð sem þessari hafi ekki heilsuspillandi áhrif, fasteignaverð í námunda við farsímastöðvar hafi ekki lækkað.
Vodafone falaðist einnig eftir að að koma upp GSM loftneti á Brúarásskóla. Þrjár nefndir sveitarfélagsins klofnuðu við afgreiðslu málsins. Fulltrúar B-lista í bæjarstjórn, fræðsluráði og bæjarráði sátu hjá því þeir vildu að sér jarðskaut yrði lagt fyrir loftnetsbúnaðinn. Þráinn Lárusson D-lista, sem sat hjá við afgreiðslu málsins í fræðslunefnd, greiddi atkvæði með því í bæjarráði og bæjarstjórn þar sem meirihlutinn samþykkti uppsetningu loftnetsins. Einnig var samþykkt að yfirfara rafmagnsmál í húsnæði sveitarfélagsins að Brúarási.
Í Fljótsdalshreppi hefur Orkulausnir, fyrirtæki Brynjólfs Snorrasonar, gert athugun á ástandi jarðtenginga á bæjum. Á nokkrum bæjum var sett aukajarðskaut í íbúðar- og fjárhús til að spennujafna húsin og draga úr rafmengun.
