Enn skorin flís af horuðu HSA
Heilbrigðisstofnun Austurlands hefur barist í bökkum í rekstri sínum síðustu árin. Þjónustuaukning vegna virkjunar- og álversframkvæmda vógu þungt og lítil mótframlög fengust frá ríkinu þrátt fyrir mjög aukið álag á HSA. Nú á enn að skera niður.
Sem dæmi um ástandið á HSA hlaupa starfsmenn í þvottahúsi í að sauma til dæmis smekki upp úr gömlum handklæðum, hjúkrunarfræðingar velja vandlega ódýrustu tegund af plastsprautum í hvert sinn sem sprauta þarf sjúkling, tæki sem bila, eins og þvottavélar, hafa verið endurnýjuð fyrir gjafafé og álag á starfsfólk almennt fer hraðvaxandi. Áætlað fjármagn til sjúkraþjálfunar á Egilsstöðum er uppurið og halli á rekstri stofnunarinnar er yfir þrjúhundruð milljónir króna. Í sumar lokuðu nokkrir byrgjar á frekari reikningsúttektir og frægt varð þegar loka átti fyrir rafmagnið í haust vegna vangoldinna rafmagnsreikninga. Stofnunin fékk þá verðbætur vegna launa sem gerði kleyft að borga allra brýnustu útgjaldaliðina í bili.
Undanfarið hefur yfirstjórn HSA unnið samkvæmt ósk heilbrigðisráðherra að áætlun um hvernig skera megi útgjöld stofnunarinnar niður um 10%, en slíkt þurfa heilbrigðisstofnanir um allt land að gera. HSA hefur nú skilað tillögum um lækkun launakostnaðar og tilfærslu starfa milli fólks og staða. Um er að ræða niðurskurð á rekstrarkostnaði um 5%, sem þýðir rúmlega hundrað milljónir króna. Ljóst er að þjónustan skerðist við þessar aðgerðir en þó gera tillögurnar ekki ráð fyrir að loka þurfi deildum, heldur niðurskurði á vinnu, yfirvinnu og breytingum á störfum innan HSA.
Einar Rafn Haraldsson, framkvæmdastjóri HSA, segist vonast til að framlag komi frá ríkinu á fjáraukalögum svo stofnunin geti greitt skuldir sínar.
Ljósmynd:
Einar Rafn Haraldsson, framkvæmdastjóri HSA, ræðir við Guðlaug Þór Þórðarson heilbrigðisráðherra.
Mynd/Steinunn Ásmundsdóttir
