Forgangssætið hækkar
Flugfélag Íslands hefur hækkað verð á forgangssætum á flugleiðinni Reykjavík-Egilsstaðir um 7%. Forstjóri félagsins segir annað erfitt í verðbólgutíð.
Fargjaldið hækkaði um ríflega eitt þúsund krónur, kostar núna 15.720 krónur en var 14.640 áður. Árni Gunnarsson, forstjóri Flugfélags Íslands, segir fargjöld félagsins taka mið af eftirspurn og þróun verðlags á aðföngum. Mörg fargjöld breytist þannig dag frá degi en forgangsflokkurinn hafi verið óbreyttur frá í ágúst 2007 og sé núna hækkaður um 7%.
Árni segir að flugfélagið reyni að halda aftur af verðhækkunum því verð hafi áhrif á eftirspurn en þegar aðföng öll hækki.
„Í árferði þar sem 15% verðbólga er og þrátt fyrir að eldsneyti hafi á heimsmarkaði lækkað eins og þú segir að þá er það nú því miður þannig að við kaupum eldsneytið í dollar og því hefur gengissig krónunnar mikil áhrif, einnig er stór hluti viðhaldskostnaðar og öll innkaup á varahlutum í erlendri mynt og hefur sá kostnaður hækkað um 60-70% á þessu ári.“
Á Okursíðu Dr. Gunna var fullyrt að fargjaldið hefði hækkað um 25% en Árni segir þar vitlaust farið með tölur. Hann segir að miðað við innanlandsflug á Norðurlöndunum sé hagstætt að fljúga á Íslandi og bendir á að hæstu fargjöld séu almennt hærri en hér.
