Gæluverkefni á kostnað barnanna í Fjarðabyggð
Fyrir áramót var samþykkt fjárhagsáætlun Fjarðabyggðar fyrir árið 2024 og þriggja ára fjárhagsáætlun fyrir 2025 - 2027. Skemmst er frá því að segja að bæjarfulltrúar Sjálfstæðisflokksins greiddu atkvæði gegn fjárhagsáætluninni. Ástæðan er einföld. Núverandi meirihluti rekur sveitarfélagið með síauknum lántökum og gjaldskrárhækkunum en þorir á sama tíma ekki að horfast í augun við þann rekstarvanda sem sveitarfélagið er í og uppsafnaða viðhaldsþörf sem er um allt sveitarfélagið.
Fjarðabyggð er eitt öflugasta sveitarfélag landsins. Meðaltekjur eru þær hæstu á landinu með öflug fyrirtæki í iðnaði, sjávarútvegi og fiskeldi. Í kringum fjórðungur af vöruútflutningi þjóðarinnar kemur frá fyrirtækjum í Fjarðabyggð. Með þennan tekjugrunn, sem við erum öfundsverð af, er í raun ótrúlegt, og sjálfstætt rannsóknarefni, hvernig hægt er að koma sveitarfélaginu í þá stöðu sem það er í dag.
En í ljósi ofangreinds þá þykir undirrituðum sæta mikilli furðu að á meðan grunnskólabörnum á Eskifirði er keyrt í íþróttir á Reyðarfirði sökum myglu í íþróttahúsinu á Eskifirði og engir fjármunir eru settir í viðgerðir hvorki á þessu ári eða 2025 til 2027, þá er ráðstafað á þessu ári 25 milljónum í áframhaldandi endurgerð Lúðvíkshússins á Norðfirði.
Undirritaður sendi inn fyrirspurn fyrir nokkrum mánuðum um heildarkostnað Fjarðabyggðar við uppgerð Lúðvíkshússins. Þrátt fyrir ítrekanir hafa engin svör fengist. Gera má fastlega ráð fyrir því að kostnaðurinn hlaupi á nokkrum tugum milljóna. Í fyrra voru settar 25 milljónir í verkið sem dæmi, og ekki ólíklegt að hann slagi hátt í hundrað milljónir í heildina.
Tugir milljóna, jafnvel hundrað, í gæluverkefni meirihlutans á meðan að ekki er gert ráð fyrir lagfæringum á myglu í íþróttamannvirkjum. Dæmi hver fyrir sig en forgangsröðun sem þessi, lýsir ágætlega meirihluta sem er ekki neinum tengslum við rekstur og viðhald í sveitarfélaginu né við þarfir íbúanna og þá ekki síst barnanna í Fjarðabyggð.
Höfundur er bæjarfulltrúi Sjálfstæðisflokksins í Fjarðabyggð
