Álfasteinn í vandræðum
Álfasteinn ehf., sem átti sinn heimavöll á Borgarfirði eystri í áratugi frá 1981 en flutti vinnslu sína til Raufarhafnar fyrir fáum misserum, er í verulegum rekstrarvandræðum. Stjórn félagsins hefur sagt af sér.
Allur rekstur á Borgarfirði er úr sögunni og virðist sem áform um frekari uppbyggingu í steinvinnslu á Raufarhöfn séu að renna út í sandinn. Takist ekki að fá aukið hlutafé í fyrirtækið eða selja það er líklegt að gjaldþrot blasi við.
Hlutafé var aukið er félagið flutti vinnslu sína á Raufarhöfn. Stærstu hluthafar eru Steinn Eiríksson, fyrrverandi framkvæmdastjóri Álfasteins, Síldarvinnslan og Byggðastofnun. Auk þess eiga ýmsir einstaklingar og fyrirtæki á Raufarhöfn, Borgarfirði og víðar minni hluti.
Fulltrúar hluthafa tóku sæti í stjórn félagsins í byrjun árs 2009. Stjórnin sagði af sér snemma í vor og í bréfi til sýslumannsins á Seyðisfirði kemur fram að ástæða afsagnarinnar sé meðal annars slæm skuldastaða fyrirtækisins, auk þess sem stjórninni hafi gengið illa að afla upplýsinga um stöðu fyrirtækisins. Þá kemur fram í bréfinu að stjórnin hafi komist að því að ekki hafi verið tilkynnt um hlutafjáraukningu í fyrirtækinu. Steinn Eiríksson, fyrrverandi framkvæmdastjóri, hefur sagt á því eðlilega skýringu. Ekki hafi verið ljóst þegar unnið var með endurskoðendum hvernig skiptingin var milli eignaraðila og því ekki hægt að tilkynna hlutafé inn á þeim tímapunkti. Hlutverk nýrrar stjórnar, verði hún kosin, hljóti að vera að tilkynna um hlutafjáraukningu. Ef ekki komi inn fjármagn í fyrirtækið eða takist að selja það líti ekki út fyrir að fyrirtækið fari í rekstur á ný. Verði það niðurstaðan glatist allt hlutafé.
Ásamt fjölbreyttri gjafavöru var sérvinnsla með greftri í stein stór hluti af framleiðslu Álfasteins, auk þess sem framleidd hafa verið legsteinar og skilti. Auk framleiðslunnar rak Álfasteinn verslanir á Borgarfirði eystri, á Laugavegi í Reykjavík, svæði í Flugstöðinni í Keflavík, Eden í Hveragerði og þjónustu- og sölumiðstöð á Axarhöfða í Reykjavík. Á Raufarhöfn var áformuð magnframleiðsla á byggingarsteini og mikil vöruþróun og markaðssetning var á döfinni.
