Valdið heim
Nýfrjálshyggja síðustu áratuga hefur svipt dreifbýli og smáþorp Íslands efnahagslegu og pólitísku valdi. Jarðir, kvóti og auðlindir eru keyptar upp af auðkýfingum að sunnan eða erlendis frá og heimamenn sitja eftir með minna og minna milli handanna.Þau okkar sem hafa búið í brothættum byggðum landsins þekkjum það að heyja það sem stundum virðist vera óvinnandi orrustu fyrir því að þorpið leggist ekki í eyði. En lausnin er til staðar ef við þorum að hrinda henni í framkvæmd: Valdefling byggðanna.
Sósíalísk byggðastefna byggir á að færa byggðarlögum vald um eigin framtíð og tryggja þannig raunverulega sjálfbærni. Þær auðlindir sem er að finna í heimabyggð ber að nýta á félagslegan hátt sem þjónar íbúum byggðalagsins.
Jarðir á svæðinu skulu vera í eigu fólks sem býr á þeim og nýtir þær í þágu samfélagsins í byggðinni. Miðin eiga að vera nýtt af heimafólki og vald yfir úthlutun nýtingarréttar á þeim miðum í höndum samfélagsins á svæðinu. Afurðir sem sóttar eru til lands og sjávar á að fullvinna í heimabyggð og auka þannig sjálfbærni og tryggja fjölbreytt atvinnulíf.
Staðan í dag er sú að mörg byggðarlög treysta á utanaðkomandi stórfyrirtæki til að halda í sér lífinu. Sú staða er óásættanleg og lausnin er valdefling með sósíalískri byggðastefnu. Sósíalistar vilja taka valdið úr höndum stórfyrirtækja, úr höndum auðvaldsins og fá valdið heim.
https://sosialistaflokkurinn.is/malefnaflokkar/byggdamal/
Höfundur situr í 7.sæti á lista Sósíalistaflokksins í Norðausturkjördæmi fyrir alþingiskosningarnar 25. september.
