Verslum í heimabyggð
Nú er aðventan að ganga í garð með öllu því sem henni tilheyrir. Allskyns tilboð hrúgast inn í pósthólfið og lúguna. Staðbundin verslun hefur átt undir högg að sækja með tilkomu netverslana, innlendra sem og erlendra.Erfitt er að keppa við risaverslanir, sem senda með æ minni fyrirhöfn um allt land. Þessi gylliboð fá mann til að velta fyrir sér samkeppnisstöðu verslana í heimabyggð sem halda úti verslunum og starfsfólki heima í héraði.
Í Fjarðabyggð hefur verslunum fækkað á undanförnum árum, og er það miður. Enn eru þó starfræktar verslanir hér sem halda úti þjónustu og bjóða upp á vörur á samkeppnishæfu verði. Þessi fyrirtæki láta gott af sér leiða til samfélagsins. Á aðventunni er sérstaklega mikilvægt að leiða hugann að því að ekki er sjálfgefið að þessar verslanir séu starfræktar í ört erfiðari samkeppnismarkaði með tilkomu netsins.
Verslanir eins og Veiðiflugan, SÚN búðin og Pan, sem bjóða bæði upp á úrvalsvörur og þjónustu, þurfa á okkur að halda alveg eins og við þurfum á þeim að halda. Þá eru ótaldar hárgreiðslustofur sem bjóða upp á allskyns vörur og þjónustu, nuddstofur, gjafavöruverslanir og ýmislegt fleira.
Við þurfum að huga að nærsamfélaginu á þessum tímum, en megum auðvitað ekki gleyma því að huga að okkur sjálfum. Umfram allt er jólahátíðin tími ljóss og friðar og mikilvægt að gleyma sér ekki í amstri dagsins. Hugum hvert að öðru og njótum.
Höfundur er bæjarfulltrúi Sjálfstæðisflokksins í Fjarðabyggð
