Norðfjarðargöng: Setlag mun hægja á greftrinum
Útlit er fyrir að verulega hægist á greftri nýrra Norðfjarðarganga á næstunni því nýtt setbergslag blasir við Eskifjarðarmegin. Útlit er fyrir að það verði eitt það þykkasta sem graftarmenn hafa lent í.Gangagröftur hófst á ný 5. janúar, eftir 15 daga hlé um jól og áramót. Þokkalega gekk á báðum stöfnum í síðustu viku en grafnir voru yfir 60 metrar hvoru megin.
Nú er nýtt setbergslag að ganga upp úr gólfi Eskifjarðarmegin og nálgast þekjuna hægt. Þá hægir aftur á framvindu, því setja þarf upp miklar styrkingar, líkt og í fyrri lögum af þessu tagi.
Þykkt lagsins er um 8 metrar og búast má við því að það taki einhverjar vikur að komast í gegnum það.
Áfram er búist við þokkalegri framvindu í Fannardal.
Mynd 1: Þykkt setlag nálgast nú þekju ganganna. Lagið er mjög laust í sér og útheimtir miklar styrkingar. Búast má við að framvinda verði verulega skert á meðan farið er í gegnum lagið.
Mynd 2: Þokkalegt basalt gengur niður stafninn og undir því er kargaberg. Nokkur ummerki misgengishreyfinga eru á berginu og er það nokkuð brotið á þessum kafla.
Myndir: Hnit/Ófeigur Ö. Ófeigsson
