Ætla að skipta um hluta af lögnunum
Fréttir • This email address is being protected from spambots. You need JavaScript enabled to view it. • Fyrst birt 25. júl 2022 16:01 • Uppfært 25. júl 2022 16:01
Skipt verður um hluta þeirra lagna sem liggja að Bjólfsvirkjun, neðra stöðvarhúsi Íslenskrar orkuvirkjunar (ÍOV) við Fjarðarár í Seyðisfirði. Rör gaf sig við virkjunina í síðustu viku.
Sérfræðingur frá framleiðanda röranna kom til Seyðisfjarðar á föstudaginn var til að skoða aðstæður. Guðmundur Ingi Jónsson, framkvæmdastjóri ÍOV, segir skoðunina ekki hafa leitt neitt afgerandi í ljós, til standi að senda íhluti út til nánari athugunar.
Fjarðarárvirkjun er samheiti yfir tvær virkjanir. Uppi á Fjarðarheiði er lón og vatn úr því leitt í þrýstipípu niður að Gúlsvirkjun. Þar fer áin á rennsli og heldur áfram niður undir Fjarðarsel og er vatn leitt þaðan í pípu að Bjólfsvirkjun. Þar við hafa rör farið í sundur tvisvar á rúmum mánuði.
Guðmundur segir að ákveðið hafi verið að skipta út pípum næst Bjólfsvirkjun, þar sem vatnsþrýstingurinn sé mestur. Ekki sé búið að ákveða um á hve stórum kafla verði skipt, það verði ákveðið með framleiðanda röranna og skýrist vonandi í næstu viku.
Bjólfsvirkjun er ekki í rekstri meðan lausnir eru útfærðar.
