Aldrei séð jafn mikla seltu á raflínunum
Viðbúið er að rafmagnslaust verði í Berufirði fram yfir hádegi í dag og miklar truflanir voru í gær í Fáskrúðsfirði og á svæðinu sunnan við Djúpavog. Starfsmenn Rarik berjast við að hreinsa seltu af línum eftir storminn í byrjun vikunnar.„Við höfum ekki áður séð svona mikla seltu á búnaði hér,“ segir Kári Snær Valtingojer, hjá Rarik Austurlandi.
„Það er vel þekkt að bilanir komi fram þegar lægir eftir storm og staðan hefur verið leiðinleg eftir að það lægði í gær. Seltan veldur vandræðum um leið og blotnar í henni og sú áseta sem gerir á næturnar er nóg.“
Miklar rafmagnstruflanir voru í Berufirði, Hamarsfirði og Álftafirði í gær auk Fáskrúðsfjarðar. „Þessi svæði fóru nánast út til skiptis í gær. Við gáfumst hreinlega upp við að reyna að halda Berufirðinum inni nótt.“
Hamars- og Álfafjörður hafa haldist inni frá því um 1:30 í nótt en í Berufirði hefur verið rafmagnslaust síðan um miðnætti. Þar er önnur fjarskipti að detta út, net, símar og GSM-kerfi auk þess sem kólnar í húsum. Aðgerðir eru að fara af stað þar en ekki er útlit fyrir að rafmagn komist á fyrir svæðið milli Teigarhorns að sunnanverðu og Núps að norðanverðu fyrr en um klukkan tvö í dag.
Til að halda rafmagninu inni þurfa starfsmenn Rarik að klifra upp í hvern einasta rafmagnsstaur og skafa seltuna af búnaðinum. Það er mikið líkamlegt álag en viðgerðaflokkarnir hafa haft nóg að gera síðan á sunnudag.
Í Fáskrúðsfirði var lokið við að hreinsa seltuna af í morgun og komst rafmagn á út að Hafnarnesi um klukkan átta í morgun.
Truflanir urðu einnig í dreifikerfi Landsnets í nótt vegna seltu á Hólalínu í Hamarsfirði, en hún tengir saman Teigarhorn og Hóla í Hornafirði. Straumlaust varð á Hornafjarðarsvæðinu vegna þessa og truflanir inn á mitt Austurland.
Kári segir viðbúið að áfram verði truflanir vegna seltunnar þar sem rigni vel þannig línurnar hreinsist. Ekki er spáð rigningu á Austfjörðum fyrr en annað kvöld.
Mynd: Rarik