Ein mesta fjölgun ríkisstarfa frá upphafi mælinga en hvað minnst á Austurlandi
Frá árslokum 2021 til septembermánaðar 2022 fjölgaði stöðugildum ríkisstarfsmanna um alls 1.328. Hlutur Austurlands í þeirri tölu var alls 21 stöðugildi.
Þetta er meðal þess sem lesa má út úr nýjum tölum Byggðastofnunar um fjölgun stöðugilda hins opinbera á landinu síðasta rúmlega eina og hálfa árið eða svo en tölfræði þessa efnis leit dagsins ljós fyrir skemmstu. Í úttekt stofnunarinnar kemur fram að ekki hafi mælst meiri fjölgun starfsmanna ríkisins frá því að Byggðastofnun hóf að halda utan um slíkt.
Samkvæmt þeim tölum eru nú 582 stöðugildi ríkisstarfsmanna á Austurlandi öllu. Aðeins Vestfirðir og Norðurland vestra státa af færri starfsmönnum á vegum hins opinbera en á umræddu tímabili hefur opinberum störfum aðeins fjölgað minna en hér austanlands á Suðurlandi. Á Suðurnesjum fjölgaði þeim um 8,9 prósent, 8,2 prósent á Norðurlandi eystra og 5,4 prósent á Vestfjörðum. Prósentuaukningin fyrir Austurlandið á sama tíma er 3,8 prósent.
Af opinberum stöðugildum austanlands eru konur 376 talsins en karlmenn 206.