Engin hreyfing mælst á Seyðisfirði
Engin, eða óveruleg hreyfing, hefur mælst á mælitækjum sem vakta jarðhræringar í Seyðisfirði þrátt fyrir töluverða rigningu undanfarna daga á Austfjörðum.Samkvæmt yfirliti frá ofanflóðadeild Veðurstofu Íslands er uppsöfnuð úrkoma síðastliðna viku á Seyðisfirði komin í 160 mm. Þurrt hefur verið eystra að mestu í dag en þokuloft yfir.
Á morgun er spáð þurru veðri og björtu en á sunnudag talsverðri rigningu á sunnanverðum Austfjörðum og á mánudag á öllu svæðinu.
Í yfirlitinu kemur fram að vatnshæð í borholum sé orðin nokkuð há, í sumum meiri en hún var síðasta haust. Þess vegna er náið fylgst með mælitækjum sem vakta hreyfingar á jörðinni í Neðri-Botnum. Til þessa hefur hún verið engin eða óveruleg.