Fagna 40 ára afmæli Smyril Line

Formlegt stofnár félagsins er 1982 þótt sagan um stofnunina teygi sig yfir lengra tímabil. Farþega- og bílaferjan Smyrill tók að sigla milli Seyðisfjarðar og annarra Norðurlanda árið 1975. Það voru yfirmenn á henni sem höfðu frumkvæði að stofnun nýja félagsins til að kaupa nýja ferju, sænsku ferjuna Gustav Vasa.

Hún tók um 1000 farþega í stað 250 áður og fékk nafnið Norræna. Hún kom í fyrsta sinn til hafnar á Seyðisfirði 8. júní 1983 en stækka varð höfnina og aðstöðuna til að taka við henni.

Austfirðingar tóku þátt í stofnun félagsins og kaupa á ferjunni og áttu 4% hlutafjár Smyril-Line þegar siglingar Norrænu hófust. Sveitarfélögin á Seyðisfirði og Egilsstöðum áttu hlutafé auk einstaklinga. Jónas Hallgrímsson, sem þá var bæjarstjóri á Seyðisfirði og lengi eftir það lykilmaður innan Smyril-Line, tók við hlutafjárloforðum.

Reksturinn hefur farið í ýmsa hringi síðan og nýja félagið var ekki orðið margra ára þegar færeyska landsstjórnin lagði því í fyrsta sinn til nýtt hlutafjár. Hún á í dag tæplega fjórðungshlut en stærsti eigandinn, P/F 12.11.11 á tæp 60%. Aðrir minni hluthafar eiga 18%.

Reksturinn hefur bætt við sig. Auk Norrænu rekur Smyril-Line fimm flutningaskip sem sigla þrjár mismunandi leiðir. Tvær þeirra koma við í Þorlákshöfn. Félagið er einn stærsti atvinnurekandi Færeyja, rekur nokkrar ferðaskrifstofur auk þess að eiga Hotel Hafnia í Þórshöfn.