Hafna óskum um meiri skólaakstur í Eiða- og Hjaltastaðaþinghá
Óskum foreldra barna í Eiða- og Hjaltastaðaþinghá þess efnis að bætt verði við skólaakstur svo börnin geti tekið þátt í íþróttum og tómstundum hefur verið hafnað.
Höfnunin var staðfest á fundi fjölskylduráðs Múlaþings í vikunni en bréf með þessum óskum foreldra á þessum slóðum barst sveitarfélaginu í byrjun ágústmánaðar. Höfnunin byggir á þeim reglum að skólaakstur skal einungis vera í tengslum við upphaf og lok hvers skóladags.
Óskirnar snérust bæði um meiri akstur svo börnin í sveitinni gætu komist til síns heima þó þau tækju þátt í íþrótta- eða tómstundastarfi eftir hefðbundinn skólatíma en jafnframt að sveitarfélagið breytti formlegum skólaakstri á þessar slóðir í hreinar og beinar almenningssamgöngur.
Það flækir málið af hálfu Múlaþings að skólaakstur heyrir undir fjölskylduráð meðan almenningssamgöngur eru á forsvari umhverfis- og framkvæmdaráðs. Fjölskylduráð hefur hins vegar ekki lokað málinu alfarið því ráðið hefur falið fræðslustjóra Múlaþings að vinna samantekt á öllum skólaakstri í sveitarfélaginu í kjölfar þessa erindis.
Langi börnum í dreifbýlinu í Eiða- og Hjaltastaðaþinghá að dvelja eftir skóla við íþróttir eða tómstundir komust þau ekki til síns heima með skólabílnum. Mynd Múlaþing
