Helgin: Tónlistarfólk á ferð um Austfirði
Tónlistarmennirnir Svavar Knútur og Teitur Magnússon gera víðreist um Austurland um helgina auk þess sem hljómsveitin Brek er á ferðinni. Á Reyðarfirði verður hinn árlegi hernámsdagur á morgun.Brek hefur síðustu daga spilað á nokkrum stöðum eystra. Í kvöld er röðin kom að Borgarfirði, Beituskúrnum í Neskaupstað annað kvöld og Tehúsinu á Egilsstöðum á sunnudag.
Á síðastnefnda staðnum er tónlistarhátíðin Teboð eða „Partea“ í gangi um helgina. Auk tónleika eru djammsession alla daga milli 15-19. Teitur Magnússon hefur hátíðina í kvöld en hann heldur síðan niður á Borgarfjörð annað kvöld.
Svavar Knútur spilar á Beljanda á Breiðdalsvík í kvöld og verður með fjölskyldutónleika þar á morgun klukkan 14:00 áður en hann færir sig upp í Egilsstaði.
Ljósmyndarinn Kormákur Máni Hafsteinsson, eða KOX, opnar sýninguna „Fjórðungur“ á Skriðuklaustri á morgun. Þar eru myndir teknar vítt og breytt um Austurland á filmu. Í Vök baths verður sumarnæturopnun frá tíu í fyrramálið til klukkan 22:00 á sunnudag.
Hernámsdagurinn verður haldinn á Reyðarfirði á morgun. Frítt verður inn á Stríðsárasafnið frá klukkan 13:00 en af öðrum uppákomum má nefna fjölskyldugöngu, sögustund með sagnfræðingi um hernámið samhliða því sem tertur og fiskur með frönskum verða í boði. Um kvöldið mæta þeir Baldur Ragnarsson og Flosi Þorgeirsson, umsjónarmenn hlaðvarpsins Draugar fortíðar og fjalla um seinni heimsstyrjöldina á sinn einstaka hátt. Þeir beina sjónum sínum sérstaklega að Austurlandi.
Útimessa verður í Selskógi við Egilsstaði klukkan 10:30 á sunnudagsmorgun. Þetta verður síðasta guðsþjónusta Torvaldar Gjerde en hann hefur verið organisti við Egilsstaðakirkju í tuttugu ár. Hann mun leika á harmonikku undir almennum söng við athöfnina auk þess sem bæði núverandi og fyrrverandi prestar í prestakallinu þjóna. Messan verður færð inn í kirkjuna ef ekki viðrar til útimessu.
Knattspyrnuhelgin hefst með tveimur leikjum í fjórðu deild í kvöld. Einherji og Spyrnir mætast á Vopnafirði en BN og Spyrnir á Eskifirði. Á morgun tekur Fjarðabyggð/Höttur/Leiknir á móti HK í Lengjudeild kvenna í Fjarðabyggðarhöllinni klukkan 14:00. Á sama tíma hefst leikur Hattar/Hugins við Njarðvík í annarri deild karla. KFA spilar í Ólafsvík gegn Víkingi en í annarri deild kvenna fer Einherji til fundar við Fram í Reykjavík.