Héraðsskjalasafnið leitar að lausn á ráðgátu
Héraðsskjalasafn Austfirðinga hefur fest kaup á gamalli ljósmynd sem tekin var á Seyðisfirði árunum milli 1887 og 1907. Tilurð myndarinnar, hver tók hana og hvenær og hvers vegna er enn sem komið er nokkur ráðgáta.Þetta kemur fram á Facebook síðu Stefáns Boga Sveinssonar forstöðumanns Héraðsskjalasafnsins. Þar segir að fyrir nokkru síðan barst safninu ábending um að til sölu væri gegnum e-bay, ljósmynd frá Seyðisfirði sem í fljótu bragði væri ekki að finna á ljósmyndasöfnum hér á landi. Eftir að hafa skoðað málið var ákveðið að festa kaup á henni, en seljandinn sérhæfir sig í sölu gamalla ljósmynda.
„Við ákváðum að kaupa þessa mynd enda var hún fáanleg á góðu verði það er nokkrir þúsund kallar. Hinsvegar er uppruni myndarinnar nokkuð á huldu, það er hver tók hana og í hvaða tilgangi.“segir Stefán Bogi í samtali við Austurfrétt.
Stefán segir að hugsanlega hafi myndin verið tekin í sérstakri ferð til Íslands eða jafnvel Grænlands með stoppi á Íslandi.
„Við vitum þetta ekki núna en myndin er gott augnablik í sögu Austurlands á þessum tíma,“ segir Stefán
Tilheyrði bandarísku safni
Myndin sýnir hrossahóp með reiðtygjum við hús á Seyðisfirði sem reist var árið 1887 undir starfsemi Pöntunarfélags Fljótsdalshéraðs á svonefndum Svendsengrunni við Hafnargötu, milli Þórshamars og Skipasmíðastöðvarinnar,“ segir Stefán á Facebook.
„Húsið stóð þar til ársins 1907 að það var flutt og breytt allmikið. Það stendur nú við Hafnargötu 10 og er jafnan kallað Múli. Frá þessu segir í Húsasögu Seyðisfjarðar.
„Myndin er lituð og á glerplötu, þeirrar gerðar sem á ensku nefnist „lantern slides“. Þetta voru nokkurskonar forverar síðari tíma slides-mynda og var varpað á sýningartjald. Á myndinni kemur fram að hún tilheyri American Museum of Natural History en safnið lét útbúa myndir af þessu tagi til að lána út í skóla sem kennsluefni en einnig fyrir opinbera fyrirlestra sem haldnir voru í safninu og voru geysivinsælir á tímabili.“
Stefán Bogi hvetur þá sem hafa einhverjar upplýsingar um myndina að hafa samband.
Mynd: Facebook
