Miklir vatnavextir í Lagarfljóti ógna ekki Egilsstaðaflugvelli
„Við erum sannarlega að vakta þetta hjá okkur en það vantar enn mikið upp á að þetta valdi okkur hér einhverjum vandræðum,“ segir Ásgeir Rúnar Harðarson, umdæmisstjóri Isavia á Egilsstaðaflugvelli.
Miklir vatnavextir hafa verið í Lagarfljóti sem og öðrum ám og lækjum austanlands og ekkert lát virðist á næstu daga ef marka má spár Veðurstofu Íslands. Þar bæði áframhaldandi rigningar fram á þriðjudag sem og óvenjulegur lofthiti framyfir helgina.
Vatnshæð fljótsins er komin hátt upp að brúargólfi Lagarfljótsbrúar en Ásgeir segir töluvert vanta upp á að starfsemi á flugvellinum geti raskast jafnvel þó vel bæti í umfram það sem nú er.
„Miðað við reynslu fyrri tíma þá vantar enn tæpar meter upp á að það fari að flæða að og þá aðeins að akvegi en ekki flugbrautinni sjálfri. Við erum auðvitað með hugann við þetta en það þarf að bæta mikið í til að starsfsemin raskist nokkuð.“
Mynd tekin um hádegisbil í dag fyrir framan flugvallarstæðið. Kunnugir segja allnokkur ár vera síðan svo mikið sást í fljótinu en engin hætta er á að það hafi áhrif á flugvöllinn eða starfsemi þar.
