Móðurást fallegasta íslenska orðið
Fréttir • This email address is being protected from spambots. You need JavaScript enabled to view it. • Fyrst birt 16. nóv 2022 14:16 • Uppfært 16. nóv 2022 14:16
Orðið „móðurást“ var valið fallegasta orð íslenskrar tungu í kosningu á vegum Verkmenntaskóla Austurlands. Þetta var tilkynnt í morgun á sama tíma og skólinn tók á móti Grænfánanum í þriðja sinn.
Á Tæknidegi fjölskyldunnar, sem haldinn var í húsnæði skólans í byrjun október, var tekið á móti tilnefningum um fallegasta orðið í íslensku. Fjölmargar tilnefningar bárust og í kjölfarið var sett upp opin vefkönnun.
Í hana bárust um 500 atkvæði þar sem „móðurást“ varð hlutskarpast. Tilkynnt var um úrslitin á sal skólans í morgun á degi íslenskrar tungu.
Þar var haldin athöfn í tilefni þess að skólinn fékk Grænfánann, vottun á umhverfisstarfi skóla, afhentan í þriðja sinn og þess að skólinn lauk á árinu fimm grænum skrefum. Skólinn setur sér markmið í umhverfismálum til tveggja ára og fær grænfána ef þau nást.
Sem dæmi má nefna flokkun á rusli, miðar um að slökkva ljós, fataskiptasláin o.fl. Verkefnið græn skref hefur stutt við þetta og hafa ýmsar aðgerðir þaðan komið til framkvæmda, svo sem mæling á matarsóun, hleðslustöðvar fyrir rafbíla og hjólaskýli.
Frá athöfninni í morgun. Mynd: VA
