Samið um aukna þjónustu við þolendur ofbeldis

Skrifað var formlega undir samninginn í gær en ráðgjafar frá Aflinu hafa komið austur undanfarið ár og veitt viðtöl. Áður hafa Stígamót, ráðgjafar- og fræðslumiðstöð gegn kynferðisofbeldi, veitt þjónustu eystra en þar er farið að vísa á Aflið eystra.

Þjónustan sem Aflið veitir er hins vegar á breiðari grunni. „Aflið er ekki bara fyrir þolendur kynferðisofbeldis heldur leitar til dæmis líka til okkar fólk sem orðið hefur fyrir einelti í æsku og slíku. Eins hittum við aðstandendur,“ útskýrir Sigurbjörg Harðardóttir, verkefnastjóri og ráðgjafi hjá Aflinu.

Aflið hefur bækistöðvar sínar á Akureyri og hefur að undanförnu verið að víkka út þjónustu sína á Norður- og Austurlandi. Júlía Sæmundsdóttir, félagsmálastjóri Múlaþings, segir það styrkja þjónustuna að veita hana úr nærumhverfinu.

„Félagsþjónustur beggja sveitarfélaga hafa fundið þörfina og hve gott er að geta vísað fólki í viðtöl hjá Aflinu. Okkur fannst mjög þarft að skjóta fleiri stoðum undir úrræði hér á Austurlandi, einkum þau sem sprottin eru frá landsbyggðinni.“

Samningurinn kveður á að sveitarfélögin greiði ákveðna upphæð árlega fyrir þjónustu Aflsins. Markmið samtakanna er að auglýsa eftir ráðgjafa sem staðsettur er á Austurlandi sem veitt getur þjónustuna. „Ráðgjafar Aflsins eru í verktöku og við höfum svipað fyrirkomulag í huga hér, ráðgjafa undir okkar handleiðslu. Fastur ráðgjafi hér myndi bæta þjónustuna til muna,“ segir Sigurbjörg.

Samningurinn felur líka í sér að samtökin eru reiðubúin að veita fræðslu svo sem á vinnustöðum og í skólum. Þar sem Vopnafjarðarhreppur og Fljótsdalshreppur eru með samning við félagsþjónustu Múlaþings er þjónusta Aflsins í boði fyrir alla Austfirðinga.

Sveitarfélögin munu leggja til húsnæði þar sem ráðgjafar hitta þá sem koma í viðtöl. Slíkt getur verið vandmeðfarið, skömm þolenda getur orðið til þess að erfitt sé að koma í hús þar sem annað fólk sér þá, til dæmis bæjarskrifstofur.

Til þessa hafa viðtölin annars vegar verið á bæjarskrifstofum Fjarðabyggðar á Reyðarfirði, hins vegar Samfélagssmiðjunni á Egilsstöðum. Sigurbjörg bendir á móti á að fólk eigi ýmis erindi á bæjarskrifstofur meðan erindið sé yfirleitt aðeins eitt þegar það komi inn á skrifstofur samtakanna á Akureyri. Þá hafi Austfirðingar verið viljugir til að fara milli byggðakjarna þyki húsnæðið á öðrum staðnum óþægilegt.

Ekki er enn kominn fastur viðtalstími heldur er óskað eftir þjónustu í gegnum síma eða aðrar samskiptaleiðir Aflsins, sem gefnar eru upp á vef samtakanna. Í kjölfarið er bókaður hentugur tími. Ráðgjafar Aflsins hafa komið austur á 2-3 vikna fresti, en milli tíma hefur meðal annars verið notast við fjarviðtöl. Þjónustan er notendum að kostnaðarlausu.

Frá undirritun samningsins í gær, frá vinstri: Jón Björn Hákonarson, bæjarstjóri Fjarðabyggðar, Sigurbjörg Harðardóttir, verkefnastjóri og ráðgjafi hjá Aflinu, Óðinn Gunnar Óðinsson, skrifstofustjóri Múlaþing og Júlía Sæmundsdóttir, félagsmálastjóri Múlaþings.