Styttist í full afköst kassaverksmiðju Bewi á Djúpavogi
„Tilurð fyrirtækisins var náttúrulega sú að vegna aukins laxeldis og slátrunar hér á Djúpavogi þá voru flutningar á frauðumbúðum svo miklir frá suðvesturhorninu að menn fóru að horfa í hvernig hægt væri að minnka þetta umstang og um leið kolefnissporið,“ segir Jón Þór Jónsson, verksmiðjustjóri Bewi.
Fjallað er ítarlega um kassaverksmiðjuna í nýjustu útgáfu þáttaraðarinnar Að austan á sjónvarpsstöðinni N4. Verksmiðjan hóf starfsemi í júnímánuði á þessu ári en ekki hefur náðst að keyra hana á fullum afköstum hingað til. Það breytist fljótlega að sögn Jóns.
„Menn fóru að hafa samband við aðila sem höfðu reynslu í þessu sem var fyrirtækið Bewi í Noregi og það var ákveðið að kýla á það að hefja framleiðslu hér á Djúpavogi,“
Sjálfur er Jón Þór reynslumikill því hann hóf sjálfur framleiðslu á frauðplastsumbúðum árið 1989 í Hafnarfirði.
„Ég var viðloðinn það allt fram til ársins 2018 og var nýlega hættur og í svona millibilsástandi þegar ég sá auglýsingu þar sem auglýst var eftir verksmiðjustjóra hérna.“
