Ben Hill með Hetti
Ben Hill frá Nýja Sjálandi sem spilaði með Hetti í körfunni á síðasta tímabili er mættur aftur til Egilsstaða. Hann segist ætla að spila með Hattarliðinu í vetur, en um tíma leit út fyrir að hann spilaði með Njarðvíkingum í vetur.
Úr því varð þó ekki þar sem Benny reiknaði ekki með að ná að klára úrslitakeppni með Njarðvíkurliðinu í vor. Hann ákvað því að spila með Hetti í vetur. Hann er samningsbundinn um að mæta á réttum tíma til leiks með liði sínu í Nýja Sjálandi næsta vor.
Benny spilaði að mestu undir körfunni hjá Hetti síðasta vetur, en vill frekar spila sem framherji. Á síðasta tímabili skoraði hann 21,1 stig að meðaltali í leik og tók 10 fráköst. Væntanlega góðar fréttir fyrir Hattarmenn.
