Dularfullt sæskrímsli markar upphaf heljar menningarveislu í Fjarðabyggð
Togari úti fyrir Austurlandi fékk stórt, dularfullt og áður óþekkt sæskrímsli í troll sitt og þurfti í kjölfarið aðstoð við að komast til lands á Eskifirði. Á bakkanum við Vélaverksmiðjuna geta íbúar og gestir á slaginu klukkan 17 á morgun vitnað þetta mikla skrímsli, sem hugsanlega á rætur að rekja í þjóðsögurnar, með eigin augum.
Það er með þeirri stóru sýningu Sæskrímslin sem menningar- og listahátíðin Innsævi hefst þetta árið í Fjarðabyggð. Sú þegar orðin ein viðamesta menningarhátíð landsins þó þetta verði aðeins í þriðja sinn sem hún er haldin.
Að vitna skrímsli er vafalítið góð skemmtun en þeir sem eldri eru geta haldið skemmtuninni áfram í nágrannabænum Neskaupstað langt fram á annað kvöld þar sem Love Guru skemmtir í Egilsbúð og Nonni Clausen í kjölfarið í Beituskúrnum.
Ekki tekur verra við eftir morgundaginn því eitthvað verður á boðstólnum daglega í kjölfarið. Viðburðirnir vægast sagt fjölbreyttir: Tindrandi barnasýning á Stöðvarfirði, Pressuð flóra Íslands á Fáskrúðsfirði eða hugleiðsluþungarokk með hljómsveitinn Osme svo aðeins þrjú dæmi séu tekin.
Alls munu íbúar og gestir geta sótt rúmlega 30 mismunandi listviðburði í sveitarfélaginu næstu vikurnar en hátíðin stendur linnulaust yfir frá og með morgundeginum og fram til 20. júlí og er viðburðunum skipt milli bæjarkjarna sveitarfélagsins. Í ofanálag við skipulagða dagskrá geta fyrirvaralaust bæst við pop-up viðburður hvar sem er en tilkynnt er um allt slíkt á fésbókarvef Innsævis. Þar má líka finna greinargóðar upplýsingar um öll dagskráratriði næstu vikurnar.
Ókeypis er á alla viðburði Innsævis en 2.500 króna aðgangseyrir er að tónlistarviðburðum fyrir fullorðna en áfram frítt á þá fyrir börn og ungmenni undir sextán ára aldri.
Er sæskrímslið eitt síns liðs eða eru þau mörg? Líkast til þarf að gera sér ferð niður að sjó á Eskifirði síðdegis á morgun til að fá svarið við því. Mynd Innsævi
