Hæsta tré sem fellt hefur verið á Íslandi
Í gær, þriðjudaginn 3. febrúar, átti sér stað sögulegur atburður í Hallormsstaðarskógi en þá felldi starfsfólk Skógræktar ríkisins 22 metra háa alaskaösp. Um er að ræða hæsta tré sem fellt hefur verið á Íslandi. Viðurinn verður nýttur í smíði gufubaðs við Mógilsá.
Tréð, sem er tæplega 40 ára gamalt, á að nota í setbekki í gufubað sem er í smíðum við Rannsóknarstöð Skógræktar ríkisins á Mógilsá. Kjartan Kjartansson, ráðsmaður þar á bæ, hefur haft veg og vanda af gerð gufubaðsins. „Við hér á Mógilsá fengum gefins lítið bjálkahús fyrir nokkrum árum,” segir Kjartan. „Í gegnum tíðina hefur verið safnað í starfsmannasjóð hér og við höfum nýtt peningana til kaupa á ýmsu inn í húsið, t.d. saunaofni. Restina höfum við síðan smíðað úr efni úr skóginum.”
Að er segir á vef Skógræktar ríkisins er gufubaðið nú óðum að verða tilbúið, því von er á alaskaöspinni stóru innan skamms. Ástæðan fyrir því að ösp varð fyrir valinu þegar vantaði efni í bekki er sú að viðurinn leiðir hita illa og því bærilegt að sitja á bekkjum úr ösp. „Hugmyndin með gufubaðinu er sú að starfsmenn geti látið hugmyndir sínar gerjast við góðan hita að loknum vinnudegi,” segir Kjartan.
(Myndir fengnar af vef Skógræktar ríkisins)
