Jóna Guðlaug blakkona ársins
Jóna Guðlaug Vigfúsdóttir, blakkona úr Þrótti, hefur verið valin blakkona ársins hjá Blaksambandi Íslands. Jóna Guðlaug var fyrirliði Þróttar sem varð Íslands-, deildar- og bikarmeistari seinasta vetur.
Hún var stigahæst á leiktíðinni, efst í bæði sóknarstigum og stigum úr uppgjöf auk þess semhún var valinn besti leikmaðurinn í 1. deild kvenna.
Jóna, sem er aðeins 19 ára gömul, hefur leikið 28 landsleiki og spilaði í sumar með liðinu í Evrópukeppninni og Evrópukeppni Smáþjóða. Hún spilaði með U-19 ára landsliði Íslands í haust sem varð í þriðja sæti á Norðurlandamótinu á Akureyri. Hún var þar valinn besti leikmaður mótsins.
Jóna fór í haust til Tromsö Volley í Noregi. Hún er stigahæst í liðinu sem er um miðju norsku úrvalsdeildarinnar.
