Skoða að færa tónleikana út í góða veðrið
Tónlistarfólkið Soffía Björg Óðinsdóttir og Pétur Ben. eru saman á ferð um landið en þau vinna hvort að sinni plötunni. Egilsstaðir eru viðkomustaður þeirra í kvöld og til skoðunar er að halda tónleikana utandyra enda yfir 20 stiga hiti á svæðinu.„Við eigum að spila á Tehúsinu kl. 21 í kvöld en Halldór (Warén) er með könnun um gangi hvort fólk vilji gera þetta að útitónleikum. Við erum til í allt,“ segir Soffía, sem sagðist vera að máta sumarkjóla þegar Austurfrétt heyrði í henni.
Hún og Pétur eru ásamt Magnúsi Tryggvasyni Eliassen, trommuleikara og Fríðu Dís Guðmundsdóttur, bassaleikara á ferð um landið til að kynna nýja tónlist sem þau eru að byrja að taka upp. Þau gefa síðan upp sitt hvora plötuna í haust.
„Við ákváðum að fara gömlu leiðina að ferðast fyrst um með tónlistina áður en farið er í hljóðver. Þá erum við heit þegar upptökur byrja.
Með þessu fáum við rétta orku í hvert lag. Ég hef gefið út tvær plötur án þess að spila þær fyrst á tónleikum. Ef maður fer fyrst í hljóðverið og svo að spila þá breytist oft orkan í lögunum. Með þessu fáum við rétta stemmingu í hvernig við syngjum og spilum lögin saman,“ útskýrir Soffía.
Þau hafa unnið saman í að verða tíu ár en þau sækja bæði í hljóm bandarískrar þjóðlagatónlistar. Soffía segir að fyrri hluti tónleikanna sé helgaður lögum Péturs en hennar séu ráðandi í seinni hlutanum. Skilin eru ekki mikil, Pétur er upptökustjóri á væntanlegri plötu hennar og þau semja hluta laga sinna saman.
Þau eru búin að vera í viku á ferðinni og ljúka hringnum um næstu helgi. „Þetta hefur gengið vel, andinn í hópnum er góður og ágætlega mætt á tónleikana. Við höfum skemmt okkur það vel að við værum til í nokkurra vikna ferð í viðbót.“
