Skrúðganga og skúlptúrar af Lagarfljótsbrúnni á 17. júní - Myndir
Lífið • This email address is being protected from spambots. You need JavaScript enabled to view it. • Fyrst birt 19. jún 2025 11:10 • Uppfært 19. jún 2025 14:10
Hátíðahöld í tilefni þjóðhátíðardagsins voru með hefðbundnu sniði á Egilsstöðum. Fjölmenni tók þátt í skrúðgöngu sem gengin var frá Egilsstaðakirkju niður að íþróttahúsinu, þar sem var stutt dagskrá áður en aðaldagskráin hófst í Tjarnargarðinum.
Lúðrasveit Fljótsdalshéraðs, lögreglan og iðkendur fimleikadeildar Hattar, sem skipuleggur hátíðahöldin á Egilsstöðum, fóru fyrir skrúðgöngunni.
Í Tjarnargarðinum var dagskrá nokkuð hefðbundin. Jóney Jónsdóttir, framhaldsskólakennari, flutti hátíðarávarp og Sigrún Jóna Óskarsdóttir, starfsmaður Lyfju, var fjallkona. Hún las meðal annars brot úr ljóðinu „Lands föður míns“ eftir Jóhannes úr Kötlum.
Rótarýklúbbur Héraðsbúa veitti sína árlegu viðurkenningu fyrir framlag til samfélagsins. Hana fékk Bryndís Ford, framkvæmdastjóri Austurbrúar og fyrrum skólameistari Hallormsstaðarskóla en hún skildi við skólann eftir að hafa tryggt háskólanám þar sem hefst í haust.
Þá voru veitt verðlaun í skúlptúrasamkeppni fyrir börn á aldrinum 5-12 ára. Þemað var Lagarfljótsbrúin í tilefni þess að 120 ár eru síðan fljótið var fyrst brúað milli Egilsstaða og Fella. Ýmsar áhugaverðar útfærslur bárust af brúnni.
Myndir: Unnar Erlingsson
