Viljayfirlýsing um fimmtíu þúsund fermetra gagnaver
Fljótsdalshérað undirritaði í dag viljayfirlýsingu við fyrirtækið Greenstone ehf. um byggingu á allt að fimmtíu þúsund fermetra gagnaveri í sveitarfélaginu. Greenstone hefur jafnframt ritað undir viljayfirlýsingu við Landsvirkjun varðandi útvegun á að minnsta kosti 50 MW af orku. Gagnaverið gæti skapað um 20 bein störf og annað eins af óbeinum störfum.
Í viljayfirlýsingu Greenstone og Fljótsdalshéraðs kemur fram að sveitarfélagið mun leggja til lóð undir gagnaver og Greenstone sjá um kynningu á möguleikum sveitarfélagsins í þessum efnum, sem og hönnun og væntanlega byggingu gagnavers.
Hafin er lagning nýs ljósleiðara til Evrópu frá Íslandi og fleiri gagnatengingar eru í farvatninu til að tengja landið betur bæði við Evrópu og Norður-Ameríku. Áhersla er lögð á lagningu nýs ljósleiðara milli Íslands og Bandaríkjanna í viljayfirlýsingunni. Segir að slíkt muni auka möguleika á að alþjóðleg fyrirtæki sjái sér fært að staðsetja gagnaver sín á Íslandi og nýta þannig vistvæna orku landsins til að kæla og keyra mengunarlausan tæknibúnað gagnavera.
Hugsanlegt er að vatn úr Lagarfljóti verði notað til að kæla búnað gagnavers á Fljótsdalshéraði.
Greenstone hefur undirritað svipaðar viljayfirlýsingar við fleiri íslensk sveitarfélög undanfarið. Ekki er sopið kálið þó í ausuna sé komið, en ljóst að um vænlegan atvinnuveg er að ræða ef af verður.
Eiríkur Bj. Björgvinsson, bæjarstjóri Fljótsdalshéraðs og Sveinn Óskar Sigurðsson hjá Greenstone undirrituðu yfirlýsinguna.
Ljósmyndir/Steinunn Ásmundsdóttir
