Heimahjúkrun og rekstur Sundabúðar áfram á hendi Vopnfirðinga
Fréttir • This email address is being protected from spambots. You need JavaScript enabled to view it. • Fyrst birt 30. des 2014 15:25 • Uppfært 30. des 2014 15:26
Kristján Þór Júlíusson heilbrigðisráðherra og Ólafur Áki Ragnarsson, sveitarstjóri Vopnarfjarðarhrepps, undirrituðu í dag endurnýjaðan samning sem felur í sér að Vopnafjarðarhreppur mun áfram sjá um rekstur hjúkrunarheimilisins Sundabúðar og heimahjúkrunar í sveitarfélaginu. Að auki var veitt heimild fyrir rekstri eins dagdvalarrýmis í húsnæði Sundabúðar.
Upphaflegur samningur um þetta efni var gerður fyrri hluta árs 2013. Áður hafði rekstur hjúkrunarheimilisins verið á hendi Heilbrigðisstofnunar Austurlands.
Í tilkynningu heilbrigðisráðuneytisins segir að með samningnum sé áhersla lögð á eflda þjónustu í heimabyggð og aukin verkefni til sveitarfélaganna. Jafnframt sé sérstaklega horft til þeirra tækifæra sem í þessu felast til að samþætta þjónustu við aldraða íbúa sveitarfélagsins.
Samningurinn gildir til ársloka 2015.
