Þorvaldur Jóhannsson hlýtur fálkaorðuna
Fréttir • This email address is being protected from spambots. You need JavaScript enabled to view it. • Fyrst birt 01. jan 2015 15:07 • Uppfært 01. jan 2015 15:07
Þorvaldur Jóhannsson, fyrrum bæjarstjóri og skólastjóri á Seyðisfirði, var á meðal ellefu einstaklinga sem fengu riddarakross hinnar íslensku fálkaorðu í dag við hátíðlega athöfn á Bessastöðum.
Í tilkynningu frá embætti forseta Íslands segir að Þorvaldur hljóti krossinn fyrir framlag til mennta og framfara í heimabyggð.
Þorvaldur er fæddur á Siglufirði árið 1940 og útskrifaðist sem handmennta- og íþróttakennari. Hann hóf störf sem slíkur á Seyðisfirði strax eftir útskrift árið 1960.
Árið 1975 varð hann skólastjóri og gegndi þeirri stöðu þar til hann varð bæjarstjóri árið 1984. Eftir það varð hann framkvæmdastjóri sambands sveitarfélaga á Austurlandi til ársins 2010.
Þorvaldur hefur einnig verið mikilvirkur í ýmiss konar félagasamtökum en hann var meðal annars formaður íþróttafélagsins Hugins um þriggja ára skeið.
