Síminn setur upp 4G á Reyðarfirði
Síminn hefur komið upp 4G farsímasendi á Reyðarfirði. Þessi fjórða kynslóð farsímasenda eflir sambandið til muna, þar sem hraðinn um netið eykst. Auk þess leyfir tæknin áhorf í háskerpu og niðurhal kvikmynda á mettíma.4G farsímanet Símans nær nú til ríflega 72% landsmanna. Það hefur stækkað ört á árinu eða fimmfaldast litið til fjölda senda. Þá eru sífellt fleiri tilbúnir fyrir 4G tæknina.
„Við sjáum að 4G snjalltækjum hefur fjölgað hratt og vel í höndum landsmanna. Í ársbyrjun 2013 voru aðeins 2% viðskiptavina með slík en eru nú tæplega fimmtungur. Þá styðja 85 af hverjum hundrað seldum símtækjum í verslunum 4G tæknina þessa stundina.
Síminn hefur byggt upp í takti við þessa þróun og er kominn með þessa fjórðu kynslóð farsímasenda í alla landshluta," segir Gunnhildur Arna Gunnarsdóttir, upplýsingafulltrúi Símans.
Fyrsti 4G sendirinn á Austurlandi var í sumar settur upp á Egilsstöðum. Nú var einnig settur upp sendir á Höfn í Hornafirði.
„Við hjá Símanum erum hvergi hætt og munum enn bæta 4G sambandið á árinu. 4G kerfi Símans vex með hverjum deginum sem líður og við erum afar ánægð með að geta nú boðið þjónustuna á Reyðarfirði," segir Gunnhildur Arna.
