Rafmagnslaust í Skriðdal í um tíu tíma
Fréttir • This email address is being protected from spambots. You need JavaScript enabled to view it. • Fyrst birt 12. jan 2015 20:30 • Uppfært 12. jan 2015 20:31
Rafmagnslaust hefur verið á flestum bæjum í Skriðdal síðan á ellefta tímanum í morgun. Illa gengur að finna bilunina sem virðist vera í jörðu.
„Okkar menn eru orðnir heitir, það er búið að einangra bilunina við ákveðið svæði," segir Ólafur Birgisson, deildarstjóri netreksturs RARIK á Austurlandi í samtali við Austurfrétt á níunda tímanum í kvöld.
Rafmagnslaust hefur verið á flestum bæjum í sveitinni síðan kortér fyrir ellefu í morgun. Ólafur segir að bilunin sé trúlega í streng eða spenni ofan í jörðinni.
„Þegar menn sjá ekki bilunina getur verið erfitt að finna hana."
Hann kvaðst þó vonast til að bið Skriðdælinga eftir rafmagni á ný færi senn að styttast þar sem menn virðist vera á réttum slóðum í leitinni.
