Ákveðið að rýma á Stöðvarfirði, Eskifirði og Fáskrúðsfirði
Ákveðið hefur verið að rýma afmörkuð svæði á Stöðvarfirði, Eskifirði og Fáskrúðsfirði vegna hættu á krapaflóðum. Skólahaldi var hætt á Stöðvarfirði á hádegi í dag.Þegar er byrjað að hafa samband við íbúa til að rýma hús sín. Á Stöðvarfirði er horft á svæði við Einarsstaðaár, einkum þá innri en skólinn stendur milli áa.
Ekkert formlegt rýmingarkort er til af Stöðvarfirði þar sem hættumat er enn í vinnslu. Veðurstofan skipuleggur hins vegar rýminguna, sem á að taka gildi klukkan 14:00. Um er að ræða hús í nágrenni skólans sem kallað er reitur 4.
Rýmingar á Fáskrúðsfirði og Eskifirði taka gildi klukkan 16:00. Á Fáskrúðsfirði er húsið Ljósaland rýmt. Á Eskifirði efstu húsin við farveg Grjótár.
Veðurstofan er einnig að aðstæður í dreifbýli og hefur verið í samskiptum við fólk þar. Austfirðingum er almennt ráðlagt að vera sem minnst á ferðinni fram til morguns á meðan appelsínugular veðurviðvaranir í gildi, allra síst við vatnsfarvegi þar sem krapaflóð eru þekkt.
Í dag kom í ljós að snjóflóð hafði fallið á skíðasvæðinu í Oddskarði í vikunni. Það skemmdi geymsluskúr við barnalyftuna. Björgunarsveitir hafa í dag aðstoðað íbúa á rýmdum svæðum á Norðfirði, Eskifirði og Seyðisfirði við að komast heim til sín og sækja nauðþurftir. Engar frekari rýmingar eru áætlaðar þar að sinni.
Aðgerðastjórn almannavarna fundar klukkan 13:30. Nánari frétta er ekki að vænta fyrr en eftir þann fund.
Eftirtalin hús eru rýmd á Stöðvarfirði:
Borgargerði 2
Hólaland 12 & 12a
Túngata 8
Skólabraut 20
Sundlaugin á Stöðvarfirði
Fjarðarbraut 55 & 56
Hús neðan við Fjarðarbraut 56
Íbúar eru beðnir um að gefa sig fram í fjöldahjálparstöð í Gamla samkomusalnum eða hafa samband í síma 1717 ef fyrirhugaður dvalarstaður liggur fyrir. Fulltrúar aðgerðastjórnar munu fara milli húsa frá klukkan 13 og 14 og aðstoða og veita leiðbeiningar þeim er þurfa.
Einarsstaðaá um klukkan 13:00 í dag. Mynd: Björgvin Valur Guðmundsson