Appelsínugul viðvörun gefin út fyrir Austfirði
Veðurstofa Íslands hefur gefið út appelsínugula viðvörun fyrir Austfirði vegna ofankomu og síðar asahláku. Viðvörunin tekur gildi klukkan 19 í kvöld og gildir út morgundaginn.Í nótt er spáð austan og norðaustan 10-15 m/s og talsverðri snjókomu. Þegar líður á daginn er spáð hlýnandi veðri og mikilli hláku. Áður hafði verið gefin út gul viðvörun.
Viðbragðsaðilar eru nú á fundum vegna þeirra aðgerða sem ráðast þarf í í dag til að bregðast við veðurspánni. Frekari upplýsingar fást eftir þau fundahöld sem standa fram undir hádegi.
Samkvæmt upplýsingum frá Landsbjörgu er dagurinn nýttur meðal annars til að byrgja glugga í þeim húsum sem skemmdust í snjóflóðinu á mánudag til að koma í veg fyrir frekari skaða.
Fimmtíu manna lið kom af höfuðborgarsvæðinu með flugi á mánudag til að veita Austfirðingum aðstoð. Hluti þess liðs er komið niður á firði og hefur meðal annars gist í varðskipinu Þór sem kom til Norðfjarðar í morgun. Aðgerðastjórar úr hópnum hafa meðal annars leyst af heimamenn þar.
Frá Neskaupstað í morgun. Mynd: Landsbjörg
