Bílvelta á Fagradal

Óhappið átti sér stað um miðjan dag á laugardag. Hált var á veginum og missti ökumaður stjórn á bílnum með þeim afleiðingum að hann fór út af veginum, valt og endaði á þakinu.

Samkvæmt upplýsingum frá lögreglu slapp ökumaðurinn, sem var einn í bílnum, með minniháttar meiðsli en bíllinn er mikið skemmdur.

Helgin var annars róleg hjá lögreglunni. Áfram var eftirlit með ökumönnum, einkum með ölvun, en allir virtust hafa sitt á þurru.

Lögreglan hefur annars minnt vegfarendur, bæði gangandi og akandi, á sýnileika í umferðinni nú í svartasta skammdeginu. Gangandi eru brýndir til að nota endurskinsmerki, sérstaklega að foreldrar gæti þess að börn þeirra séu sýnileg.

Fólk á farartækjum á hjólum er minnt á að hafa ljósabúnað í lagi en samkvæmt tilkynningu sem lögreglan á Austurlandi sendi frá sér í síðustu viku hefur nokkuð borið á því að ljósabúnaður sé í ólagi.