Frostið mun bíta vel fyrir austan fram að jólum
„Það verður hæglætisvindur fram á sunnudaginn en svo gæti golan farið að gera vart við sig og jafnvel einhver strekkingur í og með í næstu viku,“ segir Einar Sveinbjörnsson, veðurfræðingur hjá Veðurvaktinni.
Drjúgt frost hefur mælst víðast hvar hér austanlands síðustu vikuna og á því verður framhald alveg til jóla samkvæmt líkönum veðurstofa og líkön Veðurvaktarinnar sýna það sama að sögn Einars. Ekki aðeins er frost að herða heldur og sterkar líkur á töluverðri snjókomu í og með og þá sérstaklega á Héraði
„Það eru engar nýjar fréttir að þegar vindáttin stendur að norðan og frost fer saman við hægviðri þá fer frostið að bíta mjög duglega og þá sýnu mest á Úthéraði og norður til Vopnafjarðar. Segja má að þetta skiptist eiginlega á Fagradal og firðirnir ættu að sleppa betur þó auðvitað verði töluvert frost þar líka.“
Spám almennt ber saman um að frostið verði mest austanlands í dag föstudag og á laugardag en þá daga mun frostið ná hámarki á láglendi í bili. Töluvert á að snjóa í byrjun næstu viku, sérstaklega á þriðjudag en á móti dregur aðeins úr frostinu þangað til á Þorláksmessu þegar frostatölur ná tveggja stafa tölum á nýjan leik.
Töluvert á að snjóa í vikunni fram að jólum um allt austanvert landið. Mynd GG
